पर्सा प्रशासनको कडाइ बिचौलिया मुक्त सेवा अनिवार्य, गैरकानुनी असुली गर्नेलाई कडा कारबाही

समाचार

गृहपृष्ठ
समाचार
पर्सा प्रशासनको कडाइ बिचौलिया मुक्त सेवा अनिवार्य, गैरकानुनी असुली गर्नेलाई कडा कारबाही

पर्सा प्रशासनको कडाइ बिचौलिया मुक्त सेवा अनिवार्य, गैरकानुनी असुली गर्नेलाई कडा कारबाही

आइतबार, चैत २२, २०८२ प्रकाश दैनिक

पर्सा जिल्ला प्रशासन कार्यालयले सेवाग्राहीलाई बिचौलियामुक्त, छिटो, सरल र सहज सेवा उपलब्ध गराउने प्रतिबद्धता दोहोर्‍याएको छ। कार्यालयले जारी गरेको सूचनामार्फत सेवा प्रवाहलाई पारदर्शी र प्रभावकारी बनाउन बिचौलियाको हस्तक्षेप पूर्ण रूपमा अन्त्य गर्ने अभियानलाई कडाइका साथ कार्यान्वयन गरिने जनाएको हो।

सूचनामा जिल्ला प्रशासन कार्यालय पर्साबाट प्रदान गरिने सेवा नियमित रूपमा बिचौलियामुक्त ढंगले सञ्चालन हुँदै आएको उल्लेख गर्दै जिल्लाभरका सबै सरकारी कार्यालयलाई समेत यही प्रणाली अपनाउन आग्रह गरिएको छ। यसले सेवाग्राहीले बिना झन्झट र अतिरिक्त आर्थिक भारबिना सेवा पाउने अपेक्षा गरिएको प्रशासनको भनाइ छ।

प्रशासनले विशेष रूपमा चेतावनी दिँदै कार्यालय वरिपरि वा सेवा सहजीकरणको नाममा सेवाग्राहीसँग गैरकानुनी रूपमा रकम असुल्ने व्यक्तिहरूमाथि कडा कारबाही गरिने जनाएको छ। यस्ता गतिविधिमा संलग्न जो–कोहीलाई कानुन बमोजिम दण्डित गरिने स्पष्ट पारिएको छ।

प्रशासनिक अधिकृत रेखा कुमारीद्वारा हस्ताक्षरित उक्त सूचनाले सेवाग्राहीलाई प्रत्यक्ष रूपमा सम्बन्धित कार्यालयबाट मात्रै सेवा लिन आग्रह गर्दै कुनै पनि प्रकारको अनावश्यक प्रभाव वा बिचौलियाको प्रयोग नगर्न सचेत गराएको छ।

पर्सा प्रशासनको यस कदमले सेवा प्रवाहमा सुधार ल्याउने, भ्रष्टाचार नियन्त्रणमा सहयोग पुग्ने र नागरिकको सरकारी सेवाप्रति विश्वास बढ्ने अपेक्षा गरिएको छ।

प्रकाशित मिति: आइतबार, चैत २२, २०८२ १३:३५

प्रतिक्रिया दिनुहोस्