राष्ट्रिय स्वतन्त्र पार्टी (रास्वपा) पर्साको प्रथम ऐतिहासिक जिल्ला अधिवेशनबाट प्रतिनिधिसभा सदस्य हरि पन्त जिल्ला सभापतिमा निर्वाचित भएका छन्। सभापति पदका लागि भएको प्रतिस्पर्धात्मक निर्वाचनमा उनले आफ्ना प्रतिद्वन्द्वीलाई ४८ मतको फराकिलो अन्तरले पराजित गर्दै नेतृत्वको जिम्मेवारी प्राप्त गरेका हुन्।
अधिवेशनमा सहभागी प्रतिनिधिहरूको मतबाट निर्वाचित भएपछि नवनिर्वाचित सभापति पन्तले सम्पूर्ण प्रतिनिधि, पार्टीको केन्द्रीय संगठन विभाग, निर्वाचन समिति तथा शुभेच्छुकहरूप्रति हार्दिक आभार व्यक्त गरेका छन्। उनले आफूलाई दिएको विश्वास र समर्थनलाई संगठन सुदृढीकरण तथा पार्टीको लक्ष्य प्राप्तिका लागि उपयोग गर्ने प्रतिबद्धता जनाएका छन्।
निर्वाचन परिणाम सार्वजनिक भएपछि पन्तले जारी गरेको धन्यवाद सन्देशमा पर्सा जिल्लाको संगठन निर्माण, पार्टीलाई जनतासँग थप नजिक पुर्याउने तथा कार्यकर्ताको भावना समेटेर अघि बढ्ने आफ्नो प्राथमिकता रहने उल्लेख गरेका छन्। उनले निर्वाचनलाई प्रतिस्पर्धाभन्दा पनि पार्टीभित्र लोकतान्त्रिक अभ्यासको उत्सवका रूपमा लिनुपर्ने धारणा व्यक्त गर्दै सम्पूर्ण नेता तथा कार्यकर्तालाई एकताबद्ध भएर अघि बढ्न आग्रह गरेका छन्।
रास्वपा पर्साको प्रथम जिल्ला अधिवेशन पछिल्ला केही दिनयता निकै चर्चामा रहेको थियो। प्रतिनिधि नामावली र निर्वाचन प्रक्रियालाई लिएर देखिएको विवादका कारण अधिवेशन केही समय प्रभावित भए पनि पार्टी नेतृत्वको पहलमा सहमति जुटेपछि निर्वाचन प्रक्रिया पुनः अघि बढाइएको थियो। अन्ततः लोकतान्त्रिक विधिबाट नेतृत्व चयन भएसँगै अधिवेशन सफलतापूर्वक सम्पन्न भएको छ।
राजनीतिक वृत्तमा समेत चासोका साथ हेरिएको यस निर्वाचनमा सभापति पदका लागि प्रतिनिधिसभा सदस्यद्वय हरि पन्त र सुशील साह कानुबीच प्रतिस्पर्धा भएको थियो। दुवै नेताको जिल्लामा प्रभाव रहेकाले निर्वाचनलाई रास्वपा पर्साको भावी नेतृत्व र संगठनात्मक दिशासँग जोडेर हेरिएको थियो।
निर्वाचनपछि नवनिर्वाचित सभापति पन्तले पार्टीभित्रको एकतालाई अझ मजबुत बनाउँदै पर्साका सबै पालिका र वडासम्म संगठन विस्तार गर्ने, जनताका मुद्दालाई प्राथमिकताका साथ उठाउने तथा पार्टीलाई जिल्लामा थप सशक्त राजनीतिक शक्तिका रूपमा स्थापित गर्ने लक्ष्य रहेको बताएका छन्।
अधिवेशनबाट नयाँ नेतृत्व चयन भएसँगै रास्वपा पर्साले संगठनात्मक पुनर्संरचना, कार्यकर्ता परिचालन तथा आगामी राजनीतिक गतिविधिलाई थप प्रभावकारी ढंगले अघि बढाउने अपेक्षा गरिएको छ। पार्टीका नेता तथा कार्यकर्ताले पनि नयाँ नेतृत्वको चयनसँगै संगठनलाई थप गतिशील र एकताबद्ध बनाउने विश्वास व्यक्त गरेका छन्।
पर्सा जिल्लामा पहिलो पटक सम्पन्न भएको रास्वपाको जिल्ला अधिवेशनलाई पार्टीको संगठन विस्तार तथा आन्तरिक लोकतन्त्रको महत्वपूर्ण अभ्यासका रूपमा हेरिएको छ। नयाँ नेतृत्व चयन भएसँगै अब जिल्लामा पार्टीको गतिविधि थप सक्रिय हुने अपेक्षा गरिएको छ।
-1780904822.jpg)
