वीरगञ्ज महानगरपालिका–नगवा क्षेत्रमा छाडा कुकुरको आतंक बढ्दै गएको भन्दै स्थानीयवासीले तत्काल नियन्त्रणको माग गरेका छन्। नगवामा दिनदहाडै छाडा तथा आक्रामक कुकुरहरूको समूहले एउटा बाख्राको पाठोलाई आक्रमण गरी मारेको घटनापछि स्थानीय बासिन्दा थप चिन्तित बनेका छन्।
कुकुरको आक्रमणबाट मरेको बाख्राको पाठो र घटनाबारे स्थानीयले गुनासो गरेका छन्। स्थानीयका अनुसार पछिल्लो समय नगवा क्षेत्रमा छाडा कुकुरहरूको संख्या उल्लेख्य रूपमा बढेको छ भने ती कुकुरहरूले पशुचौपायामाथि पटक–पटक आक्रमण गर्न थालेका छन्।
घटनापछि पशुपालक किसानहरूले आफूहरूको जीविकोपार्जनमै असर पर्ने अवस्था सिर्जना भएको बताएका छन्। एक स्थानीयले छाडा कुकुरहरूको झुण्डले अचानक आक्रमण गर्दा पाठोलाई बचाउन नसकिएको गुनासो गरेका छन्। उनीहरूले यस्ता घटनाले आर्थिक क्षति मात्र नभई बालबालिका, वृद्धवृद्धा तथा सर्वसाधारणको सुरक्षामाथि समेत प्रश्न उठाएको बताएका छन्।
स्थानीयवासीका अनुसार बिहान र साँझको समयमा कुकुरहरूको समूह सडक तथा बस्ती आसपास घुम्ने गरेको छ। पशुचौपाया चराउन लैजाँदा वा खुला ठाउँमा छाड्दा आक्रमणको जोखिम बढेको उनीहरूको भनाइ छ। केहीले कुकुरहरू असामान्य रूपमा आक्रामक देखिने गरेको दाबी गर्दै सम्बन्धित निकायले स्वास्थ्य परीक्षण र व्यवस्थापनमा ध्यान दिनुपर्ने माग गरेका छन्।
नगवा क्षेत्रका बासिन्दाले वीरगञ्ज महानगरपालिका, पशु सेवा कार्यालय तथा सम्बन्धित सरोकारवाला निकायलाई छाडा कुकुर व्यवस्थापनका लागि प्रभावकारी कार्यक्रम सञ्चालन गर्न आग्रह गरेका छन्। उनीहरूले कुकुरहरूको नियन्त्रण, खोप व्यवस्थापन, बन्ध्याकरण तथा सुरक्षित स्थानमा व्यवस्थापनका लागि तत्काल पहल आवश्यक रहेको बताएका छन्।
स्थानीयका अनुसार यदि समयमै उचित कदम चालिएन भने यस्ता आक्रमणका घटना थप बढ्न सक्ने र मानव सुरक्षासमेत जोखिममा पर्न सक्ने अवस्था देखिएको छ। उनीहरूले पशुचौपायाको सुरक्षा र सर्वसाधारणको सुरक्षाका लागि सम्बन्धित निकायको ध्यानाकर्षण गराएका छन्।
घटनाले नगवा क्षेत्रका पशुपालक किसानहरूमा त्रास फैलाएको छ भने छाडा कुकुर व्यवस्थापनको विषय पुनः चर्चामा आएको छ। स्थानीयवासीले अब यस्ता घटनाको पुनरावृत्ति रोक्न ठोस र दीर्घकालीन समाधानको अपेक्षा गरेका छन्।
-1780904822.jpg)
