भारतको महावाणिज्य दूतावास, वीरगञ्ज (नेपाल) को आयोजनामा प्रतिष्ठित शंकराचार्य गेटमा १२औँ अन्तर्राष्ट्रिय योग दिवस उत्साहपूर्वक मनाइएको छ। भारत र नेपालबीचको गहिरो सांस्कृतिक तथा आध्यात्मिक सम्बन्धको प्रतीक मानिने उक्त स्थलमा आयोजित कार्यक्रममा विभिन्न क्षेत्रका विशिष्ट व्यक्तित्व तथा सर्वसाधारणको उल्लेखनीय सहभागिता रहेको थियो।
कार्यक्रमका प्रमुख अतिथि मधेश प्रदेशका मुख्यमन्त्री कृष्ण प्रसाद यादव रहनुभएको थियो। यस अवसरमा भूमि व्यवस्था, कृषि तथा सहकारी मन्त्री श्याम प्रसाद पटेल तथा वन तथा वातावरण मन्त्री शंकर प्रसाद चौधरी विशिष्ट अतिथिका रूपमा सहभागी हुनुभएको थियो।
त्यसैगरी, सखुवा प्रसौनी गाउँपालिकाका अध्यक्ष जसवन्त यादव, स्थानीय वाणिज्य संघका प्रतिनिधिहरू, नेपाल–भारत मैत्री संघ (निफा), पतञ्जलि योग समिति (पर्सा र बारा), पर्साका प्रमुख जिल्ला अधिकारी, प्रहरी उपरीक्षकहरू तथा अन्य सरकारी अधिकारीहरूका साथै विभिन्न क्षेत्रका नागरिकहरूको उपस्थिति रहेको थियो।
कार्यक्रमको मुख्य आकर्षण योग विद्यार्थीहरूले प्रस्तुत गरेको उन्नत योग आसन प्रदर्शन रह्यो। उनीहरूले योगमा आवश्यक अनुशासन, लचकता र सौन्दर्यलाई प्रभावशाली ढंगले प्रस्तुत गरेका थिए। उक्त प्रदर्शनलाई उपस्थित अतिथि तथा सहभागीहरूले उच्च प्रशंसा गरेका थिए।
कार्यक्रमलाई सम्बोधन गर्दै भारतका महावाणिज्यदूतले योगलाई भारतले विश्वलाई दिएको अमूल्य उपहारको रूपमा वर्णन गर्दै यसको विश्वव्यापी महत्वबारे प्रकाश पार्नुभयो। उहाँले शारीरिक स्वास्थ्य, मानसिक सन्तुलन तथा सामाजिक सद्भाव अभिवृद्धिमा योगको महत्वपूर्ण भूमिका रहेको उल्लेख गर्नुभयो। साथै, योगले सीमा र भूगोलभन्दा माथि उठेर भारत–नेपाल मित्रतालाई थप सुदृढ बनाउने सेतुको काम गरिरहेको बताउनुभयो।
मुख्यमन्त्री कृष्ण प्रसाद यादवले अन्तर्राष्ट्रिय योग दिवस २०२६ को अवसरमा निरन्तर रूपमा योगसम्बन्धी कार्यक्रमहरू सञ्चालन गरेकोमा भारतको महावाणिज्य दूतावास, वीरगञ्जको प्रशंसा गर्नुभयो। उहाँले यस्ता गतिविधिले जनस्वास्थ्य तथा समग्र कल्याणप्रति जनचेतना अभिवृद्धि गर्नुका साथै नेपाल र भारतबीचको सांस्कृतिक तथा जनस्तरको सम्बन्धलाई अझ मजबुत बनाएको धारणा व्यक्त गर्नुभयो।
मध्यरातमा परेको वर्षाका बाबजुद ठूलो संख्यामा योगप्रेमीहरू बिहानै कार्यक्रममा सहभागी भएका थिए। स्वास्थ्य, सद्भाव र समग्र कल्याणको सन्देश बोकेको उक्त आयोजनाले सीमापार एकता, सहकार्य तथा दिगो जीवनशैली प्रवर्द्धनमा योगको प्रभावकारी भूमिकालाई पुनः पुष्टि गरेको आयोजकले जनाएको छ।
महावाणिज्य दूतावासले अन्तर्राष्ट्रिय योग दिवस २०२६ को अवसरमा योगका फाइदाबारे जनचेतना फैलाउने तथा भारत–नेपाल मित्रतालाई अझ प्रगाढ बनाउने उद्देश्यले विभिन्न योग कार्यक्रमहरूको शृङ्खला सञ्चालन गरेको थियो। सोही शृङ्खलाको समापन आज शंकराचार्य गेटमा आयोजित मुख्य समारोहमार्फत गरिएको दूतावासले जनाएको छ।
-1781681658.jpeg)
