मुस्लिम समुदायको महान् धार्मिक पर्व मोहरमको अवसरमा शुक्रबार पर्साको वीरगञ्जमा परम्परागत ताजिया (दाहा) भव्य रूपमा निकालिएको छ। विभिन्न वडा तथा मुस्लिम बस्तीबाट सजाइएका आकर्षक ताजिया, मातमी जुलुस र धार्मिक झाँकीसहित हजारौं श्रद्धालु सहभागी भएका थिए।
बिहानदेखि नै वीरगञ्जका विभिन्न स्थानबाट ताजिया निकालिएको थियो। सहभागीहरूले इमाम हुसैनको बलिदानको सम्झनामा मातमी धुन, धार्मिक नाराबाजी तथा परम्परागत प्रदर्शन गर्दै निर्धारित मार्ग हुँदै ताजियालाई दाहा स्थलसम्म पुर्याएका थिए। जुलुसमा युवादेखि ज्येष्ठ नागरिकसम्मको उल्लेखनीय सहभागिता रहेको थियो।
मोहरम इस्लाम धर्मावलम्बीका लागि शोक, त्याग, सत्य र न्यायको प्रतीकका रूपमा मनाइने पर्व हो। करिब १४ सय वर्षअघि कर्बलाको युद्धमा इमाम हुसैनले अन्यायविरुद्ध दिएको सर्वोच्च बलिदानको स्मरण गर्दै प्रत्येक वर्ष ताजिया निकाल्ने परम्परा रहिआएको छ।
वीरगञ्जमा पनि यो पर्व धार्मिक आस्थाका साथै सामाजिक सद्भावको प्रतीकका रूपमा मनाइँदै आएको छ। यस वर्ष ताजिया पर्वलाई शान्तिपूर्ण, अनुशासित र मर्यादित रूपमा सम्पन्न गराउन जिल्ला प्रशासन कार्यालय पर्साले पूर्वतयारीस्वरूप सर्वपक्षीय समन्वय बैठक गरी नौबुँदे आचारसंहिता लागू गरेको थियो। प्रशासनले निर्धारण गरेको रुट, समय र सुरक्षासम्बन्धी मापदण्डको पालना गर्दै जुलुस सञ्चालन गरिएको थियो।
जुलुसको सुरक्षाका लागि नेपाल प्रहरी, सशस्त्र प्रहरी र अन्य सुरक्षा निकायका ठूलो संख्यामा सुरक्षाकर्मी परिचालन गरिएको थियो। प्रमुख चोक, धार्मिक स्थल तथा भीडभाड हुने क्षेत्रमा विशेष सुरक्षा व्यवस्था मिलाइएको थियो। सम्भावित अप्रिय घटना रोक्न निगरानीसमेत बढाइएको थियो।
यसअघि प्रशासनले ताजिया जुलुसमा कुनै पनि प्रकारका हातहतियार, भाँठा, उच्च ध्वनिका डिजे तथा सामाजिक सद्भावमा असर पुग्ने गतिविधि नगर्न आग्रह गरेको थियो। सहभागीहरूले प्रशासनको निर्देशनको पालना गर्दै अनुशासित ढंगले पर्व मनाएका कारण सम्पूर्ण कार्यक्रम शान्तिपूर्ण रूपमा सम्पन्न भएको जनाइएको छ। ताजिया जुलुस हेर्न विभिन्न समुदायका नागरिक सडक किनारमा उपस्थित भएका थिए।
मुस्लिम समुदायका अगुवाहरूले मोहरमले अन्यायविरुद्ध सत्यको पक्षमा उभिन, सहिष्णुता, त्याग र मानवताको सन्देश दिने बताए। उनीहरूले धार्मिक विविधताबीच आपसी सम्मान र सामाजिक एकता कायम राख्न यस्ता पर्वले महत्वपूर्ण भूमिका खेल्ने धारणा व्यक्त गरे। वीरगञ्जमा प्रत्येक वर्षझैं यस वर्ष पनि मोहरम पर्व धार्मिक आस्था, सामाजिक सद्भाव र सुरक्षा निकायको प्रभावकारी व्यवस्थापनका बीच सफलतापूर्वक सम्पन्न भएको छ।
