भीषण वर्षाको चेतावनीपछि सरकार उच्च सतर्क, सर्वसाधारणलाई सावधानी अपनाउन आग्रह

समाचार

गृहपृष्ठ
समाचार
भीषण वर्षाको चेतावनीपछि सरकार उच्च सतर्क, सर्वसाधारणलाई सावधानी अपनाउन आग्रह

भीषण वर्षाको चेतावनीपछि सरकार उच्च सतर्क, सर्वसाधारणलाई सावधानी अपनाउन आग्रह

मंगलबार, असार १६, २०८३ प्रकाश दैनिक

जल तथा मौसम विज्ञान विभागले मङ्गलवार र बुधवार देशका विभिन्न स्थानमा भारीदेखि धेरै भारी वर्षाको सम्भावना रहेको भन्दै विशेष सूचना जारी गरेपछि सरकारले विपद् प्रतिकार्यका लागि उच्च सतर्कता अपनाएको छ।

विपद् जोखिम न्यूनीकरण तथा व्यवस्थापन प्राधिकरणले सम्भावित बाढी, पहिरो, डुबान तथा कटानको जोखिमलाई ध्यानमा राख्दै जोखिमयुक्त जिल्लाका प्रमुख जिल्ला अधिकारी, सुरक्षा निकाय र स्थानीय तहलाई तयारी अवस्थामा रहन निर्देशन दिएको जनाएको छ। आवश्यक उद्धार सामग्री तथा जनशक्ति तयारी अवस्थामा राखिएको र सडक अवरुद्ध भए तत्काल सञ्चालन गर्न सम्बन्धित निकायलाई समेत तयारी गर्न भनिएको छ।

विभागले विशेषगरी मधेशसहित कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानमा मेघगर्जन, चट्याङसहित भारी वर्षा हुन सक्ने भएकाले नदी–खोला आसपास, पहिरोको जोखिम भएका क्षेत्र तथा होचो भूभागमा बसोबास गर्ने नागरिकलाई विशेष सतर्कता अपनाउन आग्रह गरेको छ।

यता, लामो समयदेखि वर्षाको प्रतीक्षामा रहेका किसानहरू भने पर्याप्त पानी पर्ने अनुमानले धान रोपाइँमा सहज हुने अपेक्षामा छन्।

प्रकाशित मिति: मंगलबार, असार १६, २०८३ १३:३०

प्रतिक्रिया दिनुहोस्