पर्सा जिल्लाको बहुदरमाई नगरपालिकामा नेकपा एमालेद्वारा आयोजित अगुवा भेला तथा कार्यकर्ता भेटघाट कार्यक्रम उत्साह र जनसहभागिताबीच सम्पन्न भएको छ। प्रतिनिधिसभा निर्वाचन नजिकिँदै जाँदा आयोजित उक्त कार्यक्रमले स्थानीय तहमा एमालेको संगठनात्मक सक्रियता र चुनावी तयारी थप सशक्त बन्दै गएको संकेत दिएको छ।
कार्यक्रममा स्थानीय बुद्धिजीवी, पार्टीका अगुवा नेता तथा युवा कार्यकर्ताहरूको उल्लेखनीय उपस्थिति देखिएको थियो। सहभागीहरूले पार्टीप्रति बढ्दो भरोसा र संगठनको बलियो अवस्थालाई आगामी निर्वाचनका लागि सकारात्मक संकेतका रूपमा व्याख्या गरेका छन्।
भेलामा बोल्ने वक्ताहरूले पार्टीको नीति, सिद्धान्त र राष्ट्रहित केन्द्रित एजेन्डालाई जनतामाझ प्रभावकारी रूपमा पुर्याउनुपर्ने आवश्यकता औँल्याए। उनीहरूले विकास, सुशासन र राष्ट्रिय स्वाभिमानको मुद्दामा एमाले स्पष्ट रहेको दाबी गर्दै पार्टी उम्मेदवारलाई एकताबद्ध रूपमा जिताउन कार्यकर्तालाई सक्रिय हुन आग्रह गरेका थिए।
कार्यक्रमलाई सम्बोधन गर्दै पर्सा निर्वाचन क्षेत्र नम्बर–३ का प्रतिनिधिसभा उम्मेदवार रूपेश कुमार पाण्डेले क्षेत्र विकासका लागि आफ्नो प्राथमिकता स्पष्ट रूपमा राखेका थिए। उनले कृषि आधुनिकीकरण, गुणस्तरीय शिक्षा, पहुँचयुक्त स्वास्थ्य सेवा, रोजगारी सिर्जना तथा भौतिक पूर्वाधार विकासलाई मुख्य प्राथमिकता दिने प्रतिबद्धता जनाए।
पर्सा–३ क्षेत्रमा अहिले विभिन्न दलका उम्मेदवारहरू घरदैलो र जनसम्पर्क अभियानमा सक्रिय रहेका छन् भने मतदाताहरूले मुख्य रूपमा विकास, रोजगारी र आधारभूत सेवाको सुधारलाई प्राथमिक मुद्दा बनाएका छन्।
पाण्डेले राष्ट्र र जनताको भविष्य सुरक्षित गर्न बलियो राजनीतिक नेतृत्व आवश्यक रहेको उल्लेख गर्दै एमालेप्रति विश्वास व्यक्त गर्न मतदातालाई आग्रह गरेका थिए।
बहुदरमाईसहित पर्सा–३ का विभिन्न स्थानमा भइरहेको भेला, घरदैलो तथा जनसम्पर्क कार्यक्रमले पाण्डेको पक्षमा जनसमर्थन बढ्दो देखिएको स्थानीय कार्यकर्ताहरूको दाबी छ। स्पष्ट विकास दृष्टिकोण र जनतासँगको नजिकको सम्बन्धका कारण उनी भरोसायोग्य उम्मेदवारका रूपमा स्थापित हुँदै गएको भनाइ सहभागीहरूको रहेको छ।
कार्यक्रममा नेकपा एमाले बहुदरमाई नगर कमिटीले प्रतिनिधिसभा उम्मेदवार पाण्डेलाई गम्छा ओढाएर स्वागत गरेको थियो।
नगर कमिटी अध्यक्ष प्रमोद कुशवाहाको अध्यक्षता तथा एमाले केन्द्रीय कमिटी सदस्य एवं पर्सा जिल्ला इन्चार्ज प्रभु हजराको प्रमुख आतिथ्यमा सम्पन्न कार्यक्रममा केन्द्रीय सल्लाहकार परिषद सदस्य शिव पटेल, अखिल नेपाल पिछडावर्ग (ओबीसी) महासंघका केन्द्रीय अध्यक्ष तेजप्रकाश नेपाली निषाद, मधेस प्रदेश कमिटी सदस्य तथा नगर उपप्रमुख सुष्मा कुशवाहालगायत विभिन्न तहका नेता–कार्यकर्ताहरूको सहभागिता रहेको थियो।
