नेकपा एमाले निकट जनसंगठन प्रेस चौतारी नेपाल, पर्सा शाखाको आयोजनामा जिल्ला स्तरीय भेला कार्यक्रम उत्साह रुपमा सम्पन्न भएको छ। पत्रकारिता क्षेत्रसँग आबद्ध सञ्चारकर्मी, पार्टी निकट बौद्धिक समुदाय तथा राजनीतिक नेतृत्वको उल्लेखनीय उपस्थितिमा सम्पन्न उक्त कार्यक्रमले जिल्लाको राजनीतिक तथा सञ्चार क्षेत्रबीचको समन्वयलाई थप मजबुत बनाउने विश्वास लिइएको छ।
कार्यक्रममा पर्सा जिल्लाका चारवटै प्रतिनिधिसभा निर्वाचन क्षेत्रका युवा उम्मेदवारहरूको सक्रिय सहभागिता देखिएको थियो। निर्वाचन क्षेत्र नम्बर १ का प्रदीप यादव, क्षेत्र नम्बर २ की रिमा यादव, क्षेत्र नम्बर ३ का रुपेश पाण्डे तथा क्षेत्र नम्बर ४ का जालिम मियाले कार्यक्रममा सहभागी भई समसामयिक राजनीतिक मुद्दा, विकासको वर्तमान अवस्था र आगामी योजनाबारे आफ्नो धारणा स्पष्ट रूपमा प्रस्तुत गर्नुभएको थियो।
उम्मेदवारहरूले भेलामा लोकतान्त्रिक व्यवस्थामा स्वतन्त्र, निष्पक्ष र जिम्मेवार पत्रकारिताको भूमिकालाई विशेष जोड दिएका थिए। सत्यमा आधारित समाचार प्रवाह, गलत सूचना विरुद्धको संघर्ष तथा जनताको आवाजलाई सशक्त रूपमा प्रस्तुत गर्ने कार्यमा सञ्चारकर्मीहरूको भूमिका निर्णायक हुने उनीहरूको भनाइ थियो। समाज रूपान्तरण, सुशासन प्रवर्द्धन र लोकतान्त्रिक मूल्य–मान्यताको संस्थागत विकासमा सञ्चार क्षेत्र र राजनीतिक नेतृत्वबीच सहकार्य आवश्यक रहेको धारणा पनि व्यक्त गरिएको थियो।
कार्यक्रमका सहभागीहरूले युवा उम्मेदवारहरूले प्रस्तुत गरेको स्पष्ट राजनीतिक दृष्टिकोण, योजनाबद्ध कार्यदिशा र परिणाममुखी प्रतिबद्धताले सकारात्मक सन्देश दिएको प्रतिक्रिया दिएका छन्। उनीहरूले पर्सा जिल्लामा नयाँ सोच, नयाँ नेतृत्व र परिवर्तनमुखी राजनीतिक संस्कृतिको विकास हुने अपेक्षा समेत व्यक्त गरेका छन्।
भेलाबाट पर्साका चारै निर्वाचन क्षेत्रमा संगठन विस्तार, जनसम्पर्क सुदृढीकरण र विकासमुखी एजेण्डालाई अझ प्रभावकारी रूपमा अगाडि बढाउने रणनीति तयार गरिएको बताइएको छ। आगामी दिनमा जनताको घरदैलोमा पुगेर प्रत्यक्ष संवाद बढाउने, स्थानीय आवश्यकता अनुसार विकास योजनाको खाका तयार गर्ने र युवा तथा नयाँ पुस्तालाई राजनीतिमा सक्रिय रूपमा सहभागी गराउने दिशामा विशेष जोड दिने संकेत समेत उम्मेदवारहरूले दिएका छन्।
यस भेलालाई पर्सा जिल्लामा राजनीतिक जागरण, पत्रकारिता क्षेत्रसँग सहकार्य विस्तार र युवा नेतृत्वको उदयलाई थप मजबुत बनाउने महत्वपूर्ण कदमका रूपमा हेरिएको छ। जिल्लामा विकास, सुशासन र समृद्धिको एजेण्डालाई व्यवहारमा उतार्ने दिशामा यस प्रकारका कार्यक्रमहरूले सकारात्मक ऊर्जा प्रदान गर्ने अपेक्षा गरिएको छ।
