नेपाल कम्युनिष्ट पार्टी ९एमाले० पर्सा जिल्ला कमिटीद्वारा आयोजित जिल्ला स्तरीय बृहत कार्यकर्ता भेला आज उत्साह, ऊर्जा र संगठनात्मक एकताको सशक्त सन्देशसहित सम्पन्न भएको छ। जिल्लाभरबाट आएका नेता–कार्यकर्ता, जनप्रतिनिधि, शुभेच्छुक तथा विभिन्न जनसंगठनका प्रतिनिधिहरूको बाक्लो उपस्थितिले कार्यक्रमलाई विशेष महत्व दिएको आयोजकहरूले बताएका छन्।
कार्यक्रम जिल्ला अध्यक्ष डा। विश्वम्भर शर्माको अध्यक्षतामा तथा पार्टीका केन्द्रीय उपाध्यक्ष रामबहादुर थापा ‘बादल’को प्रमुख आतिथ्यमा सम्पन्न भएको थियो। कार्यक्रममा पार्टीका केन्द्रीय सदस्यहरू, प्रदेश कमिटीका पदाधिकारीहरू, जिल्ला कमिटीका जिम्मेवार नेताहरू, स्थानीय तहका जनप्रतिनिधि, भातृ तथा जनसंगठनका अगुवा नेता–कार्यकर्ताहरूको उल्लेखनीय सहभागिता रहेको थियो।
कार्यक्रमलाई सम्बोधन गर्दै वक्ताहरूले पर्सा जिल्लामा एमालेप्रति जनविश्वास क्रमशः बलियो बन्दै गएको बताएका थिए। उनीहरूले देशको राजनीतिक स्थायित्व, सुशासन, विकास निर्माणको गति र राष्ट्रिय हितको संरक्षणमा एमालेले खेलेको भूमिकालाई जोड दिँदै आगामी दिनमा संगठनलाई अझ सुदृढ बनाउँदै जनताको अपेक्षाअनुसार काम गर्ने प्रतिबद्धता व्यक्त गरेका थिए।
भेलामा संगठन विस्तार, कार्यकर्ता परिचालन, जनसम्पर्क विस्तार तथा आगामी राजनीतिक रणनीतिबारे समेत विस्तृत छलफल गरिएको बताइएको छ। विशेषगरी युवापुस्ता, महिला र श्रमजीवी वर्गलाई पार्टी गतिविधिमा थप सक्रिय बनाउने योजनामा जोड दिइएको थियो। साथै, स्थानीय तहको विकास, रोजगारी सिर्जना, कृषि आधुनिकीकरण, शिक्षा र स्वास्थ्य क्षेत्रमा गुणस्तरीय सेवा विस्तार गर्ने विषयलाई प्राथमिकतामा राख्ने धारणा व्यक्त गरिएको थियो।
यसै अवसरमा वीरगञ्ज महानगरपालिकाका नगरप्रमुख राजेशमान सिंह तथा बहुदरमाई नगरपालिकाका प्रमुख सिंघासन साह तेली सहित जनता समाजवादी पार्टी ९जसपा० नेपाल र अन्य राजनीतिक पृष्ठभूमिबाट आएका नेता–कार्यकर्ताहरूले एमालेमा प्रवेश गरेका थिए। हजारौंको संख्यामा भएको भनिएको पार्टी प्रवेशलाई आयोजकहरूले जनताको विश्वास र एमालेप्रतिको बढ्दो आकर्षणको संकेतका रूपमा व्याख्या गरेका छन्।
पार्टी प्रवेश गर्ने नेताहरूले विकास, स्थायित्व र समृद्धिको स्पष्ट कार्यदिशा भएको राजनीतिक शक्ति आवश्यक रहेको महसुस गर्दै एमाले रोजेको बताएका थिए। उनीहरूले पर्सा जिल्लाको विकास, सामाजिक सद्भाव तथा आर्थिक समृद्धिका लागि एमालेमार्फत सक्रिय भूमिका निर्वाह गर्ने प्रतिबद्धता समेत व्यक्त गरेका छन्।
कार्यक्रममा बोल्ने नेताहरूले पर्सालाई औद्योगिक, व्यापारिक तथा आर्थिक केन्द्रका रूपमा अझ सशक्त बनाउन दीर्घकालीन योजना आवश्यक रहेको उल्लेख गरेका थिए। सीमावर्ती जिल्ला भएकाले पर्सामा पूर्वाधार विकास, उद्योग प्रवर्द्धन, सीमा व्यवस्थापन, पर्यटन विकास र लगानीमैत्री वातावरण निर्माणमा विशेष ध्यान दिनुपर्ने धारणा राखिएको थियो।
भेलाले पर्सामा संगठनात्मक एकता थप मजबुत बनाएको, कार्यकर्तामा नयाँ ऊर्जा थपेको तथा आगामी राजनीतिक यात्राका लागि स्पष्ट मार्गदर्शन गरेको नेताहरूले बताएका छन्। सहभागीहरूले पनि यस्तो बृहत भेला कार्यकर्ता मनोबल उच्च बनाउने, संगठनलाई चलायमान बनाउने र जनतासँगको सम्बन्ध अझ मजबुत बनाउने महत्वपूर्ण अवसर भएको प्रतिक्रिया दिएका छन्।
कार्यक्रमको अन्त्यतिर पार्टी नेतृत्वले जनताको विश्वासलाई केन्द्रमा राखेर समृद्ध पर्सा निर्माण र समुन्नत नेपाल निर्माणको लक्ष्य प्राप्तिका लागि दृढतापूर्वक अघि बढ्ने प्रतिबद्धता दोहोर्याएको थियो। साथै, जनताको भावना र आवश्यकता अनुसार नीति तथा कार्यक्रम कार्यान्वयन गर्दै विकास र समृद्धिको यात्रालाई गति दिने प्रतिबद्धता समेत व्यक्त गरिएको थियो।
पार्टी नेतृत्वले पर्सा जिल्लामा देखिएको संगठनात्मक उत्साह र जनसमर्थनलाई आगामी दिनमा ठोस परिणाममा रूपान्तरण गर्ने लक्ष्य राखिएको जनाउँदै कार्यकर्तालाई एकताबद्ध भएर जनताको घरदैलोमा पुग्न आह्वान समेत गरेको थियो।
