आगामी प्रतिनिधिसभा निर्वाचनको तयारी अन्तिम चरणमा पुग्दै गर्दा निर्वाचनसम्बन्धी आवश्यक छपाइ सामग्री निर्वाचन आयोगमा आइपुग्न थालेको छ। निर्वाचन व्यवस्थापनलाई व्यवस्थित बनाउन आवश्यक निर्देशिका, ऐन, नियम र अन्य प्राविधिक सामग्री पर्याप्त मात्रामा छपाइ गरी आयोगमा पठाउने काम सुरु भएको हो।
निर्वाचन आयोगका सहायक प्रवक्ता कुलबहादुर जिसीका अनुसार कमलादीस्थित नेपाल प्रज्ञा प्रतिष्ठानको छापाखानामा छापिएका मतदान निर्देशिका, मतगणना निर्देशिका, निर्वाचनसम्बन्धी ऐन, नियम तथा अन्य आवश्यक निर्देशिका छपाइ सम्पन्न भएर आयोगमा आउने क्रम सुरु भएको छ। उनले निर्वाचन व्यवस्थापनलाई सहज बनाउन यी सामग्री समयमै उपलब्ध गराउने लक्ष्य राखिएको जानकारी दिए।
प्रारम्भिक चरणमा नेपाल प्रज्ञा प्रतिष्ठानबाट करिब पाँच हजार थान छपाइ सामग्री आयोगमा आइसकेको छ। बाँकी सामग्री पनि क्रमशः आइपुग्ने र त्यसपछि सबै सामग्रीलाई निर्वाचनका अन्य आवश्यक उपकरणसँगै ७७ वटै जिल्लामा पठाउने तयारी भइरहेको आयोगले जनाएको छ।
निर्वाचन सामग्री व्यवस्थापन निर्वाचनको महत्वपूर्ण पाटो भएकाले समयमै सामग्री उपलब्ध गराउन आयोगले विशेष प्राथमिकता दिएको छ। छपाइ सामग्री जिल्लामा पुगेपछि सम्बन्धित निर्वाचन कार्यालयमार्फत मतदान केन्द्रसम्म पुर्याउने व्यवस्था मिलाइने बताइएको छ।
यसैबीच मतपत्र छपाइको काम भने जनक शिक्षा सामग्री केन्द्र लिमिटेडमा भइरहेको आयोगले जनाएको छ। मतपत्र छपाइ, सुरक्षा व्यवस्थापन तथा ढुवानी प्रक्रियालाई उच्च प्राथमिकतामा राखेर काम भइरहेको जनाइएको छ।
निर्वाचन आयोगले निर्वाचन निष्पक्ष, व्यवस्थित र विश्वसनीय बनाउन आवश्यक सम्पूर्ण प्राविधिक तथा प्रशासनिक तयारीलाई तीव्रता दिएको जनाएको छ। आवश्यक सामग्री समयमै उपलब्ध गराउँदै निर्वाचन व्यवस्थापनलाई प्रभावकारी बनाउने लक्ष्य आयोगले राखेको छ।
आगामी निर्वाचनलाई ध्यानमा राख्दै आयोगले सुरक्षा निकाय, स्थानीय प्रशासन तथा सम्बन्धित निकायसँग समन्वय गरेर तयारीलाई अन्तिम रूप दिने तयारी गरिरहेको छ।
