प्रतिनिधिसभा निर्वाचन नजिकिँदै जाँदा राजनीतिक दलहरूबीच आरोप–प्रत्यारोप र प्रतिबद्धताको प्रतिस्पर्धा चुलिएको छ। यही सन्दर्भमा राष्ट्रिय स्वतन्त्र पार्टी (रास्वपा) का सभापति रवि लामिछाने ले आफ्नो पार्टीबाट निर्वाचित हुने प्रतिनिधि अपेक्षाअनुसार काम नगरे फिर्ता बोलाउनेसम्मको कडा प्रतिबद्धता व्यक्त गरेका छन्।
आफ्नो चुनावी अभियानका क्रममा चितवन पुगेका लामिछानेले एक कोणसभालाई सम्बोधन गर्दै रास्वपाले स्वच्छ राजनीति र उत्तरदायी नेतृत्वलाई प्राथमिकता दिएको दाबी गरे। उनले परम्परागत दलहरूजस्तो व्यापारी, बिचौलिया वा स्वार्थ समूहको बोझ आफ्नो पार्टीले बोक्नुपर्ने अवस्था नरहेको जिकिर गरे।
“कुनै व्यापारी र बिचौलियालाई हामीले पोस्न पर्दैन,” उनले भने, “यदि हामीले राम्रोसँग छान्न नसकेर, रोज्न नभ्याएर रास्वपाबाट जितेर गएका मानिसहरू खराब परेछन् भने, सांसद बनेपछि पनि फिर्ता बोलाउने छौँ।”
लामिछानेले रास्वपाले यसअघि ७२ घण्टाभित्रै जिम्मेवारीबाट फिर्ता गराएको नजिर रहेको उल्लेख गर्दै पार्टीभित्र अनुशासन र नैतिकताको मापदण्ड कडा रहेको बताए। उनका अनुसार, जनतासामु गरिएको वाचा र राजनीतिक शुद्धताको सवालमा पार्टी सम्झौता गर्न तयार छैन।
उनले बहुमतको महत्त्वसमेत औंल्याउँदै भने, “भोलि सांसदहरू फिर्ता गर्दा बहुमत नपुग्ला, घट्ला भनेर हामीलाई धेरैभन्दा धेरै मत चाहिएको हो।” यस अभिव्यक्तिलाई विश्लेषकहरूले आन्तरिक नियन्त्रण र जनउत्तरदायित्वको सन्देशका रूपमा व्याख्या गरेका छन्।
चितवनको सभामा उपस्थित समर्थकहरूले रास्वपाको ‘नयाँ राजनीतिक अभ्यास’ लाई समर्थन जनाएका थिए। लामिछानेको अभिव्यक्तिले परम्परागत राजनीतिक संरचनाविरुद्ध असन्तुष्टि बोकेको मतदातालाई लक्षित गरेको देखिन्छ।
