चिया पसलदेखि घरआँगनसम्म पन्तको अभियान,घण्टीको नारा गुन्जियो पर्सा–१ मा

राजनीति

गृहपृष्ठ
राजनीति
चिया पसलदेखि घरआँगनसम्म पन्तको अभियान,घण्टीको नारा गुन्जियो पर्सा–१ मा

चिया पसलदेखि घरआँगनसम्म पन्तको अभियान,घण्टीको नारा गुन्जियो पर्सा–१ मा

बुधबार, माघ १४, २०८२ प्रकाश दैनिक

पर्सा : पर्सा निर्वाचन क्षेत्र नम्बर–१ अन्तर्गतका विभिन्न वडा टोलहरूमा राष्ट्रिय स्वतन्त्र पार्टी (रास्वपा) का उम्मेदवार हरि पन्तले जनसम्पर्कलाई तीव्र बनाएका छन्। औपचारिक मञ्चभन्दा बाहिर निस्कँदै उनले चिया पसल, चोक, गल्ली र घरआँगनमै पुगेर मतदातासँग प्रत्यक्ष संवाद गरिरहेका छन्।

कार्यकर्ता भेटघाट तथा घरदैलो कार्यक्रमका क्रममा पन्तले “राजनीति परिवर्तनको आधार जनतासँगको इमानदार संवाद हो” भन्दै आफू पुराना अभ्यासभन्दा फरक ढंगले चुनावी अभियानमा लागेको बताए। चिया गफकै क्रममा स्थानीयको समस्या सुन्ने, नोट गर्ने र समाधानका प्रतिवद्धता जनाउने उनको शैलीले टोलटोलमा घण्टी चुनाव चिन्हको चर्चा बढेको देखिन्छ।

घरदैलो अभियानमा सहभागी स्थानीयले शिक्षा, स्वास्थ्य, रोजगारी र सुशासन मुख्य सरोकार रहेको बताएका छन्। पन्तले यी विषयलाई प्राथमिकतामा राखेर संसदमा आवाज उठाउने प्रतिबद्धता व्यक्त गर्दै “पर्सा–१ लाई प्रयोगशाला बनाइने छैन, उदाहरण बनाइनेछ” भने।

अभियानका क्रममा युवादेखि वृद्धसम्मको उल्लेख्य सहभागिता देखिएको छ। रास्वपाका कार्यकर्ताहरूले घण्टीको नारा लगाउँदै टोलटोलमा माहोल तताइरहेका छन् भने पन्त स्वयं साधारण पहिरन र सहज व्यवहारका कारण मतदातासँग छिट्टै घुलमिल भएको देखिन्छ।

पर्सा–१ मा परिवर्तनको अपेक्षा बोकेका मतदाताबीच पन्तको यो घरदैलो अभियानले चुनावी माहोललाई थप रोचक बनाएको स्थानीयको भनाइ छ।